aðventan er tíminn

Var búin að gleyma þessari bullsíðu minni, sem betur fer kannski fyrir fólk;)

Jólin á næsta leyti og ég held svei mér þá að ég hafi aldrei verið svona tímalega með allt, búin með allar jólagjafir, eina sem er eftir er að klára jólakortin en það er í vinnslu svo það kemur;)

Fór með pabba gamla í gær eða við Katla og keyptum með honum allar jólagjafir, pökkuðum inn og skrifuðum á jólakortin fyrir hann.

Fékk gefins rjúpur frá vini vinar á gömlu Hú, alltaf gott að eiga góða vini sem redda manni með jólasteikina en eins og venjulega verð ég með hamborgarahrygg líka þar sem stelpurnar borða ekki rjúpur. Pabbi, Hildur og dætur verða hjá okkur á aðfangadagskvöld og svo erum við hjá pabba í hangikjeti á jóladag eins og alltaf síðan hann flutti hingað;) Gaman að því, Brynja mín ætlar svo að skella sér á Krókinn á milli hátíða en vera hér held ég á áramótunum, en Katla verður hjá pabba sínum á áramótunum. Ég er sem betur fer algjörlega í fríi um hátíðirnar í fyrsta skipti í MJÖG mörg ár, enda vann ég í fyrra bæði aðfangadagskvöld og jóladagsmorgun og hugsa að ég geri það líka næsta ár þar sem ég verð ein þá;)

Rakel hans Eyþórs er að koma á þriðjudaginn og Katla mín orðin verulega spennt að hitta systurina sína, fékk Rakel til að kaupa stóran hluta jólagjafanna fyrir mig úti og munaði það verulega miklu í verði en hún kemur með þær þegar hún kemur. Óþolandi hvað allt er dýrt hérna á klakanum.

Ætlum að eiga Þorláksmessu í kósý en ég er að vinna fram að hádegi og Katla verður á leikskólanum fram að því og síðan verður bara slakað á, rölt í bæinn og kósað með systur og dætrunum okkar öllum:) Ætlum að vera búnar að skreyta allt nema jólatréð það verður skreytt á þorlákskvöld í rólegheitum;)

Elska þennan aðventu og jólatíma en skil fólk sem kvíðir jólunum þekki því miður allt of marga sem liður þannig, bæði vegna fjárhagsáhyggja og hafa varla pening til að kaupa mat eða jólagjöf handa börnunum og vilja ekki leita sér aðstoðar því mörgum finnst það skammarlegt og ég skil það því ekki myndi ég sjálf gera það. 

Katla mín er búin að vera slæm í hálsi og alltaf að ræskja sig, hrýtur mikið og sefur frekar illa, föl og fár, en ekkert lasin samt alltaf mætt á leikskólann. Fórum loks með hana til Friðriks háls-nef- og eyrna og hann ætlar að taka úr henni háls- og nefkirtla 4 janúar nk. Úff við foreldrarnir pínu með í brókinni yfir því en vonandi gengur það bara vel. Ætla ekki að segja henni það fyrr en bara rétt áður, því hún man hvað mamman fann til þegar þetta var gert fyrir tæpu ári hjá henni haha. Þarf að vera frá leikskóla í næstum 2 vikur og ætlum við foreldrarnir að reyna að skipta því eitthvað á milli annars er ekkert mál fyrir mig að vera í báðar vikurnar nema ég verð líklega orðin geðveik;)

Skelli inn einni færslu fyrir jólin en bið ykkur vel að lifa þangað til næst

Yfirliði kveður með aðventukveðju 

ÉG og mínar

Brynjan mín farin á lokahóf í fótboltanum og kemur ekki fyrr en undir morgun sennilega;) Gaman að því, þetta er víst ungt og á að leika sér. Aðeins farin að pæla í hvað hana langar að gera eftir menntó og finnst mér líklegt að hún endi ekki á því að vera hér á klakanum og ég styð það 100% hjá henni. Um að gera að skoða sig um á meðan maður getur, gerir ekki mikið af því eftir að fólk er komið með mann og börn:)

Fór og fékk mér tattoo í gær og það sem furðulegra var að ég steinsofnaði á meðan hann var að því enda vissi hann ekki alveg hvort hann ætti að taka því sem hóli eða ekki, haha en reyndar hefur mér ekki fundist vont að fara í tattoo sumir væla úr sér augun en ég er greinilega ekki ein af þeim;) Komin með tíma í annað þann 3 nóv og er ekkert smá spennt þetta eru listaverk sem hann gerir þessi drengur;)

Katla litla stuðbolti var ekki alveg á því að fara að sofa í kvöld þar sem hún væri nú komin í helgarfrí en hún sofnaði algjörlega á núll einni þegar hún lagðist á koddann þetta krútt mitt;) Yndisleg bara. Fæ aldrei nóg af því þegar hún kemur og knúsar mann finnur alltaf á manni ef maður er ekki vel upplagður. Enda börn það næmasta sem til er held ég;) Ætlum að fara að bardúsa með afa á morgun við að setja undir vetrardekkin á Polo sýnist ekki veita af þar sem það er spáð frekar leiðinlegu veðri á næstunni og ég nenni ekki að vera í veseni með að komast um. Ekki það að Polo fer allt sem honum er ætlað að fara allavega hefur mér sýnst það þessi ár sem ég hef átt hann;)

Hildur sys kom í kvöld og ég tók hana í fótsnyrtingu og spjölluðum gerum þetta allt of sjaldan á kvöldin en hennar stelpur eru núna úti í Grímsey hjá pabba sínum í viku en koma á sunnudaginn og Kötlu hlakkar geðveikt til eins og hún segir...

Ekkert svo sem merkilegt að frétta heðan gerist ekkert margt. Brynja var hæstánægð með ferðina út og keypti helling af fötum á mömmu sína og á sig sjálfa, og að sjálfsögðu fékk Katla litla pakka líka, bleika adidas inniskó, Hello Kitty naríur og fullt af nammi og var svo fullkomlega sátt;)

Ætlum að  halda smá afmælispartý hérna þann 28 okt þar sem barnið mitt er að verða sjálfráða mikill áfangi og ætlum að bjóða nokkrum vinkonum og svo ættingjum sem sjá sér fært á að koma, annars var hún jafnvel að spá í að bjóða vinkonum í mat sjáum til hvað hún gerir.

Best að fara að góna smá á tv áður en maður sofnar en þar sem maður er vakinn kl 6 alla morgna núna er eins gott að skríða snemma í háttinn ;)

Yfirliði kveður  

Börnin mín og ég

Hef aldrei haft ástæðu til annars en að vera stolt mamma þar sem ég á svo frábærar tvær stelpur. Núna styttist í að stóra stelpan mín hún Brynja verði sjálfráða rétt um mánuður í það. Skrýtið hvað tíminn líður hratt, finnst svo stutt síðan að ég gekk með hana og fæddi en greinilega og sem betur fer líður tíminn. Samt líður hann heldur hratt að mínu áliti. Ég hef líka verið ótrúlega heppin með barnsfeður mína og samskipti mín við þá og það er ekki sjálfsagt skal ég segja ykkur. Katlan mín er bara 4ra ára en talar stundum eins og hún sé fullorðin, kæmi ekki á óvart þó svo að í henni leyndist gömul sál.  Allavega fyrir þessar tvær stelpur er ég þakklát og að hafa komist svona langt í uppeldinu þeirra. Eldri er að verða á grænni grein og það verður sú stutta líka þegar þar að kemur.

Brynjan mín er að fara til þýskalands með meistaraflokki Þór/KA að keppa við þýskt lið í evrópudeildinni, ég er svo stolt og glöð fyrir hennar hönd því ef einhver hefur sýnt metnað þá er það hún, mætir alltaf á æfingu þó sé meidd bara til að horfa á eða hita létt upp það er meira en margur myndi gera. Æi er bara svo endalaust stolt af þessum stelpum mínum og hef allan rétt til þess.

Mínar læknisheimsóknir undanfarið komu vel út, skoðanir komu út eins og best var á kosið svo ég þarf ekkert að hafa áhyggjur af því sem betur fer. Vona að ég þurfi ekki meira til lækna á þessu ári.

Setti mér heilsufarsmarkmið í maí, hætta að borða nammi, borða hollara, léttast ögn, koma hreyfingu inn í daglegt amstur og fl sem ég ætla ekki að telja upp hér. Hef ekki snert nammi í 13 vikur og langar ekki í, borða hollt en leyfi mér annað ef ég kemst í þannig aðstæður, lést um 7 kg, hreyfi mig 3-5 x í viku og hef gert síðan í júní. Hef grætt helling á þessu öllu, líður betur líkamlega, andlega og bara orkubomba frá hell, hef endalausa orku núna og þarf einnig mun minni svefn en ég þurfti. Bara gott.

Var spurð um karlamálin í vikunni, þau voru og eru svipuð bara er einstök og líður ágætlega. Sá á hvíta hestinum ef hann er til kemur þegar hann er tilbúinn líklega ef sá maður er þá til sem getur þolað mig lengur en nokkrar vikur;) Er ekki að leita því búin að reyna þá leið að leita og það er ekki endilega það rétta, best ef hann poppar upp bara þegar síst skyldi, kannski þegar ég er fimmtug eða sjötug það kemur í ljós mér liggur ekkert lífið á.

Best að hætta þessu og fara að drífa sig í vinnuna, stelpurnar báðar í fríi og ætla að dunda sér saman til hádegis en þá er ég búin, fékk mér frí eftir hádegi.

Eigið góðan dag allir saman og verið góð við hvert annað.

Við leitum hamingjunnar um allt en aldrei innra með okkur því þar er dimmt.......nokkuð góð setning.

Yfirliði kveður þenkjandi í dag... 

Ýmislegt.....

Lífið komið aftur í rútínu eftir frí, hrikalega gott þegar það gerist. Katla komin í leikskólann sæl og glöð, ég í vinnuna en Brynja er enn í fríi frá skólanum byrjar held ég 13 sept.

Brynja var að fá vinnu með skóla hjá Capacent og er ég ekkert smá stolt af því hvað hún bjargar sér þessi stelpa, hún ræður hvað hún vinnur mikið þar sem hún raðar sér sjálf á vaktir. Ágætis kaup sem þýðir að hún getur rekið bílinn sinn og keypt sér föt og gert það sem hún vill í rauninni. Best þessi stelpa.

Fórum suður um þarsíðustu helgi ég, hún og Telma vinkonan hennar. Fengum lánaða íbúð hjá Rögnu (ömmu hennar) og Magga (afa hennar) á frábærum stað í bænum og frábær íbúð. Fórum x 3 út að borða á KFC, Saffran (sem ég á ekki nógu sterkt lýsingarorð yfir) og Ítalíu ;) Síðan var kringlan skönnuð á laugardeginum og þær fóru á laugarveginn en gamla konan ég vr þá orðin fótalaus. Keyptum allar mikið af fötum og dóti, ég keypti tvennar buxur á Kötlu og boli á hana og sólirnar. Barnaföt kosta svo fáránlega lítið í Rvík miðað við hér fyrir norðan að það borgar sig að keyra suður og versla búin að sjá það. Og ekki bara barnaföt heldur bara föt almennt eru miklu ódýrari fyrir sunnan. Fáránlegt....

Missti mig algjörlega í búð sem heitir Six og keypti mér helling af eyrnalokkum úr læknastáli þar sem ég þoli fátt annað í eyrun, en ekkert síðra en annað.  Allavega var þessi ferð bara fín og eyddum við heilum 8000 kr í bensín fram og tilbaka og alla keyrsluna í borginni. Var búin að vera pinu stressuð yfir að keyra þar en svo vorum við með gps í símunum svo það varð ekkert mál og Brynja þrusaði einnig um allt. Getum allt sem við viljum. Stefnum á jólagjafaferð í borgina í nóv/des erum orðnar svo klárar:)

Ég er að fara til Vals Þórs Marteins þvagfæra þar sem allt útlit er fyrir að nýrað mitt sem var hengt upp 97 sé orðið laust enda svo sem átti þessi upphenging bara að duga í 10-15 ár og komin 13 ár þannig að....En ég er endalaust með einkenni um sýkingar sem engar eru svo sem er eitt einkennið auk þyngdartaps sem ég ræð svo sem ekki við heldur. En þegar ég lenti í þessu síðast varð ég 53 kg og ég vil ekki lenda þar aftur. En ég á að hitta hann 20 sept og þá ætlar hann að skoða þetta betur, vorum bara búin að ræða saman í síma. Vona allavega að hann geti losað mig við þessi einkenni hvað sem hann gerir. Alltaf eitthvað að mér;( 

Átti að gera við þakið hjá okkur hér um miðjan ágúst en ekkert orðið út því vegna mikilla rigninga og eiginlega er ég bara fegin því ég þarf að punga út 352 þús fyrir viðgerðinni sem ég á bara ekki í augnablikinnu þannig að ég vona að því verði frestað til næsta sumars, efast um að ég eigi samt fyrir því þá en vonandi meiri líkur.

Best að hætta þessu og fara að troða okkur í einhver föt en við hyggjumst renna til Húsavíkur kannski og Brynja ætlar að hafa svona sleepover með fótboltanum í kvöld ;)

Yfirliði kveður þokkalegur bara 

Síðasti spretturinn í fríi;(

Síðasta vikan í sumarfríi byrjuð, hefði í raun samt átt að byrja í dag en var svo heppin að uppgötva að ég átti heila viku inni þannig að ég fékk að taka hana bara:) Búin að vera ótrúlega heppin með veður þannig að maður getur ekki kvartað eiginlega. Við Katla vorum saman í tvær vikur í fríi og svo hefur hún svona fengið að vera heima dag og dag ef eitthvað sérstakt er, var svo auðvitað með pabba sínum líka í 2 vikur. Vorum duglegar að fara í sund og þvælast í ísbúðir bæjarins sem er alltaf klassískt;)

Fór á alveg hreint guðdómlega mærudaga fór á fimmtudegi og heim á sunnudegi. Fór í hvalaskoðun með bróðir og var það hrikalega gaman, síðan á föstudag fórum við systkin ásamt, Vidda mág og Bjarti og Steina og gengum hafragilshringinn. Sáum Selfoss og Dettifoss og Hafragilsfoss. Þetta var töluvert krefjandi leið fannst mér þar sem þurfti að klifra stíga sem voru ekki upp á marga fiska með þverhnípið fyrir aftan sig, upp kletta í köðlum en þvílík náttúrufegurð. Ef ég hefði vitað hvernig gönguleið þetta var þá hefði ég líklega ekki farið þar sem ég er þvílíkt lofthrædd en sem betur fer var mér ekki sagt mjög náið hvernig þetta var;) Lögðum af stað um hálfellefu að Hafragilsfossi og vorum komin upp í bíl í kringum hálffjögur  vorum áður búin að ganga að dettifossi og selfossi:) Þreytt en ánægð var komið heim til Brósa og farið í skárri föt, opnaður bjór og tölt niður á Bryggju í geimið bara gaman, síðan var slökun á laugardeginum og svo farið aftur á bryggjuna um kvöldið. Brynjan mín hringdi svo í mig á sunnudagsnóttina og sagðist koma með flugi frá Rvík þar sem hún hefði meiðst á hné í fótboltaleiknum. Þannig að ég rauk niður á stöð á sunnudagsmorgun og fékk að blása og brunaði svo heim og beint á FSA þar sem meiðslin voru sem betur fer skárri en talið var fyrst en þeir héldu að liðbandið hefði slitnað. En hún er búin að vera í hvíld og hjá sjúkraþjálfara núna og þetta er eitthvað að skána.

Síðan skellti ég mér í borgina sl. fimmtudag og kom heim á laugardag og var það bara gaman, missti samt af gaypride göngunni þar sem ég var akkúrat að fara í flug. Gríðarlegur hiti í borginni á laugardeginum og lak af manni svitinn, en mikið var gott að koma heim, heima er nefnilega alltaf best. Ætlum svo að fara á bíl suður við Brynja um aðra helgi eigum bara eftir að finna okkur gistingu sem er ekki einhversstaðar lengst aftur í rassgati. Verðum góðar brúmmandi tvær alveg glórulausar en við erum með gps í símunum okkar og ég held þetta verði bara fínt, held meira að segja að þetta sé menningarnótt;)

Katla mín kom heim í gærkvöldi hringdi í mömmu sína og vildi bara fá að koma heim, ekki hafði mamman neitt á móti því og brunaði og sótti djásnið;) Keyptum okkur tvo fallega fiska og fiskabúr og heita fiskarnir sveppi og Emilia og í haust bætist við froskur sem á að heita Gói;) Þær systur ætla að fara og velja sér frosk eða salamöndru fer eftir því hvort hentar betur í búrið....

Annars er þetta allt í rólegheitum enn sem komið er, við höfum þak yfir höfuðið og mat að borða og mer skilst að það sé meira en margur annar hefur....

Yfirliði kveður á kafi í fiskeldi 

Kjaftstopp í marga mánuði óvenjulegt;)

Dúllamía alveg búin að gleyma að skrifa hérna, ekki að ég haldi að margir lesi en líklega einhverjir þó;)

Sumarið kom um leið og ég fór í frí, ekki svo sem við öðru að búast þar sem ég er sólarmegin í lífinu;) Katla mín fór í frí 20 júní og er til 18 júlí þannig að hennar frí er langt komið. Ég fór í frí 4 júlí og er til 8 ágúst.

Ætla ekki að gera mikið í fríinu þar sem það kostar augun úr að hreyfa sig og maður má þakka fyrir að geta sinnt þessu nauðsynlega, eins og að kaupa mat og eiga fyrir bensíni, þetta virðist lítið ætla að skána en þýðir ekkert fyrir mig einhverja litla Ernu úti á landi að rífast yfir því, hlutirnir breytast ekkert við það. En ætla þó að skella mér í göngu með honum brósa mínum á föstudaginn þarnæsta og taka svo eitt gott mærudagsdjamm á laugardeginum ef ég verð ekki gengin upp að öxlum, ef ég þekki bróðir minn rétt þá verður þetta ekkert 2-3 tíma ganga, ég geri ráð fyrir minnst 8 tímum sem er bara gaman;) Katla verður hjá pabba sínum og Brynja mín verður í Reykjavík að keppa þannig að ég læt mig bara hverfa á gömlu hú enda ekki oft sem ég nenni að fara þangað.

Síðan ætlum við Brynja að fara í smá mæðgnaferð til Reykjavíkur og versla aðeins í byrjun ágúst, vona að það gangi upp, verst að við erum báðar óttalegir nördar þegar að umferðinni í borginni kemur en það hlýtur að reddast eins og annað. Hittist yfirleitt á að ef ég hef tíma að gera eitthvað þá er hún upptekin og svo öfugt þannig að ekki oft sem við tvær getum gert eitthvað.

Við Katla erum búnar að vera duglegar að hendast í sund, fórum t.d. á Þelamörk í morgun og vorum í rúma 2 tíma komum tilbaka, brúnar og sælar og þreytta og mamman peningaveskislaus þannig að við þurfum auðvitað að bruna þangað aftur og sækja veskið, litla stýrið var ekki alveg sátt því við vorum að fara að fá okkur pylsu þegar veskishvarfið uppgötvaðist og við verulega svangar;) Breytir hana engu ennþá þó maður geri ekkert stórt í sumarfríi er hæstánægð með nestisferð út í móa eða bara í sund;)

Brynja mín hefur verið að kljást við meiðsli í hnjám og kom loks í ljós að hún var með annan fótinn of stuttan og sin í öðru hnénu farin að þykkna og vöðvar við hnéskeljar eitthvað ekki í góðu ástandi, þannig að ég dreif hana í göngugreiningu þar sem hún fékk ný innlegg en á að nota gömlu einnig (hann breytti þeim bara aðeins) og svo fékk hún hælahækkanir í nokkra skó. Síðan tekur bara við sjúkraþjálfun og vonandi lagast þetta svo hún geti haldið áfram að gera góða hluti í boltanum.

Bættist við gæludýr heimilisins þar sem hunangsflugur hafa komið sér fyrir undir pallinum okkar og gaman að fylgjast með þeim koma með hunang á öllum skönkum og troða sér inn undir pallinn og heyra svo suðið í þeim meðan þær losa sig við fenginn, mjög vinnusamar. Er samt ekki eins kát með þær undanfarið þar sem þær eru farnar að trufla okkur sólþyrstu mæðgurnar á pallinum, hugsa að ég neyðist til að eitra fyrir þeim ef þær halda þessu áfram greyin, eins er ég svo heppin að hér í mikilli nálægð er líklega geitungabú og þeir eru farnir að gera sig býsna heimakomna, veiddi einn vænan í háf og myrti hann með gleði, þoli þá ekki. En mikið gerði ég góð kaup í bleika háfnum hennar Kötlu þó svo að upphaflega hafi hann verið keyptur til að veiða í síli en sú veiði gafst ekki vel;)

Jæja best að fara að kasta sér í bælið þar sem hún Katla mín vaknar líklega snemma eins og venjulega.

Eigið góða daga gott fólk þar til ég kem næst

Yfirliði kveður sæll og sáttur;) 

 

Sumarið er tíminn;)

Það er bara ekki hægt að neita því að um leið og fer að vora þá lifnar yfir manni, maður verður orkumeiri, glaðari og svo ég tali nú ekki um fallegri því það fylgir nú bara því að vera glaður og orkumeiri;) Eini gallinn við vorið í mínum huga eru helvítis pöddurnar, þoli ekki köngulær og randaflugur og við ræðum ekki geitungana. Ég var nú svo einstaklega heppin að fá eina drottningu inn til mín í gær en sökum snarræðis kattarins þá rauk hún út aftur. 

Klukkan ekki nema rúmlega 10 og enn er fólk að skemmta sér hérna í blokkinni á bak við mig, gaman að því, enda vekur sumarið mann hreinlega til lífsins;)

Sumarfrí staðfest 4júlí - 8 ágúst en síðasti vinnudagur er 1 júlí íhahhahahhaha, djöss sem maður skal vera duglegur að njóta. Efast um að mikið verfði farið sökum bensínverðs og dýrtíðar á íslandi en þá er að njóta þess sem okkar fallega sýsla býr yfir eins og sundlauganna, heimagerða íssins, útivistarsvæði, fjörurnar og fleira og fleira;) Ákveðin samt í því að eyða einum degi í Ásbyrgi í sumar og jafnvel í Hljóðaklettum í minni fallegu heimabyggð.

Leikskólinn hjá Kötlu lokar 15 júní -20 júlí eða öfugt man það ekki alveg en hún verður hjá pabba sínum eitthvað af þeim tíma þar til ég fer í frí og svo bara höfum við þetta frjálslegt svona, spilum þetta eftir eyranu eins og sagt er.

Þarf að fara að kaupa mér hlaupaskó í dag og þeir sem ég þarf, innanfótarstyrkta kosta 29 þús er þetta eðlilegt, þegar ég keypti mér síðast hlaupaskó fyrir 3 árum kostuðu þeir nú töluvert minna eða helmingi því sem næst...

Svo er alltaf verið að hvetja fólk til hreyfingar og að borða hollt og svona en hvernig í ósköpunum á það að vera hægt þegar allt sem tengist hreyfingu og hollustu hefur hækkað svona rosalega en svo hefur sælgæti ekki hækkað nærri eins mikið enda ekki talið til nauðsynjavöru og þá hækkar það ekki. Eins og kom fram í einhverri könnun þá hefur neysla fólks á kexi dregist töluvert saman en neysla á sælgæti staðið í stað eða jafnvel aukist því það er ódýrara!!!!

En svona er nú íslandi í dag og mér finnst ísland alltaf gott en er nú komin á fullt í að æfa mig í norskunni, er aðallega núna að kíkja á málfræðina, skil norskuna þegar ég les hana og að mestu þegar ég hlusta á hana sérstaklega ef ég er með textann fyrir framan mig en ég er ekki eins góð að segja heila setningu upp úr sjálfri mér;) En það kemur með tíð og tíma. Set núna sem langtímamarkmið að fara út í eins og 2 vikur af sumarfríinu mínu næsta sumar og vinna, aðallega til að sjá eitthvað nýtt og prófa eitthvað nýtt, gott að breyta ögn til svo maður staðni ekki s.s. víkka út sjóndeildarhringinn. Er svo lukkuleg að frændi minn er með atvinnumiðlun í Norge fyrir hjúkrunarfr. og sjúkraliða og hann er búinn að lofa mér VIP meðferð hvað sem svo felst í henni;)

Well jentan ætlar að drullast í einhver föt og leita sér að skóm

Yfirliði kveður í fallegu vorveðri ;) 

Já því ekki:)

Lífið er ljúft, seisei já, fallegt veður, nýbúin að kúra undir teppi og horfa á fallegustu mynd allra tíma Notebook, var að horfa á hana í 11 skipti held ég og mér finnst hún alltaf jafn góð. Hausinn fullur af kvefi en hlýtur að fara fyrir rest, getur ekki verið gaman að hanga í hausnum á mér;)

Andrea babydoc hringdi í gær, prufur komu fínt út nema smá kreatín hækkun í þvagi hjá litla barninu, verður fylgst með því með annarri þvagprufu eftir tvær vikur, en ef hún versnar eigum við að koma með hana, og halda vel að henni vökva..verður fín í næstu prufu vonandi;) Er hjá pabba sínum núna í dosemdaryfirlæti ef ég þekki þau feðginin rétt:)

Ætla að fara að pilla mér í föt og reyna að fá mér einhverja hreyfingu í einhverju formi, veit ekki hvort ég á að nenna að hlaupa vegna kvefsins en kannski hjóla eða labba, verð að fara að hreyfa mig áður en allur skrokkurinn hrynur, ekki langt í það ef ekkert er að gert, langar líka að fara og þvo pall og þvo glugga og eitthvað svona að duddast sé til hvað ég verð iðin;) Spurning á að byrja á því að vaska upp, farin að þrá uppþvottavél, mikið er þetta leiðinlegt verk;)

Skreyttum aðeins í kringum okkur mæðgur í gær, settum páskakerti og styttur og dúka og dúllerí, bara gaman að því, á svo mikið páskaskraut að það er farið að slarka í jólaskrautið;) Ákvað að vera ekki með lifandi greinar í ár þar sem ég fékk svo mikinn feta inn til mín í fyrra í kjölfar greinanna að þær litu út fyrir að vera lifandi af iði;)

Mikil umræða á meðal sjúkraliða á mínum vinnustað að drífa sig til Noregs og er ein að fara, mér finnst þetta hrikalega spennandi og ætla að hafa þetta að markmiði að geta farið til noregs og unnið í 2 vikur eftir einhverja mánuði og því er ég byrjuð að stúdera norskuna sem er alls ekki erfitt að skilja en erfiðara að tala;) En norðmenn eru nokkuð þolinmæðir skilst mér hvað málakunnáttu okkar varðar þannig að líklega þarf maður ekki að hafa áhyggjur;)

Þvi segi ég bara

Ha en god dag og smil

Paramedic djellan er farin over and ot:) 

 

Lífið og Icesave hjá Liðanum:)

Árið byrjar svona stórvel hjá okkur mæðgum, fyrst ég í endalausum veikindum sem sá loks fyrir endann á. Þá fær litla barnið flensuna og búin að vera með hita í 5 daga og mikið ofaní sér og vesen. Fórum til Andreu barnalæknis í gær og hún tók strok úr klobbanum hjá Kötlu til að útiloka strepthokokka þar, Katla vildi ekki leyfa henni að hlusta sig né skoða hálsinn þannig að það kemur í ljós bara en hún er með surgandi andardrátt og hóstar mikið, vonandi nær hún þessu upp. Hún fékk nettan hitakrampa í fyrrinótt en þá var hún komin með 40,2 gráður og meðvitund lítil sem engin, hef ekki séð hana svona lasna greyið litla, þorði ekki að sofna fyrr en ég sá að hitinn fór lækkandi. Nóttin í nótt var 4ra tíma svefn en hún fann svo til einhversstaðar en vildi ekki segja það en það lagaðist loks fyrir rest. Tókum svo þvagprufu í morgun og pabbi hennar fór með hana. En enn er hún ómögleg með minni hita samt. Úff vona svo að þetta fari að lagast...

Icesave kosning á morgun og enginn vafi hjá liðanum hvar krossinn fer, segi nei enda illa menntuð og of ung til að kjósa rétt miðað við það sem maður hefur heyrt. Búin að fá þvílíkar blommeringar vegna þess að ég ætla að segja Nei að mér finnst þetta með ólíkindum. Afhverju hef ég ekki gáfurnar til að kjósa rétt þó svo að ég sé ekki með háskólapróf og bara 38 ára? Og afhverju má ég ekki bara segja Nei án þess að einhver Jón úti í bæ sé að blommera það. Er ekki enn örugglega lýðræði á klakanum þó svo að einhverjir vilji auðvitað gera landið að Kúburíki og stefnir allt í það og klárlega ef samningar verða samþykktir þá hætti ég að skrá mig með ríkisfang á íslandi og skrifa bara Kúba. Já svona er þetta allir hafa sína skoðun og það merkilega er að allir hafa rétt á henni ennþá allavega.

Ég ætla að láta þetta nægja að sinni og fara að horfa á Emil og grísinn með henni Kötlu sem hreinlega elskar Emil enda blundar í henni lítill Emil ójá

Eigið góða helgi þið sem rennið yfir þetta rugl í mér

Yfirliði kveður over and out 

Dagur í lífi liðans....

Hringt í mig í gær varðandi segulómunina og ég er s.s. ekki deyjandi eins og ég var klárlega farin að halda;) Hún kom vel út þannig að nú er allavega búið að útiloka að þetta sé nokkuð arfaslæmt eins og maður var farinn að hallast að. Er með eitthvað þarna í móðurlífinu sem á að taka með tíð og tíma en ekkert slæmt;) Verkirnir eru s.s. óútskýrðir nema að mjólkin hafi valdið þessu, allavega hef ég ekki fundið þessa verki svona slæma eftir að ég hætti að snerta það sem er mjólk;)

Katla búin að vera í slíku stuði alla helgina að það er búið að vera erfitt fyrir mig öldunginn að hafa við henni. Fórum í göngutúr í gær í kerrunni og rökræddum fram og aftur að nú væri kominn tími á að nota fæturnar og hætta þessu kerrurölti, litla ekki sátt við það enda afburðaþægilegt að biðja um göngutúr og slaka bara sjálf á;) Skruppum til pabba í kaffi og hún er orðin svo lagin við að láta hann skoppa í kringum sig að það hálfa væri nóg. Síðan í dag tókum við snjókast á þetta og skemmtum okkur konunglega við að finna stað fyrir blómabeð og svona og fundum meira að segja kónguló á lífi helv...eini gallinn við hlýindin;)

Katla fór í 4ra ára skoðun og kom ljómandi vel út úr því, nema hún var svolítið feimin við þessa konu sem tók hana í prófið en gekk vel samt. Fór líka í foreldraviðtal á Kotinu þar sem hún kom rosalega vel út í öllu nema hún er svolíitð óörugg á köflum sem er líka alveg eðlilegt, aðallega við aðstæður þar sem foreldrar koma og allir eru s.s. feimin bara eins og mamma hennar var, veit ekki hvort pabbinn hefur verið feiminn á sínum yngri árum.

Prufuðum aðeins Hafliða í dag og ákváðum að nú færum við á hann reglulega alltaf til skiptis því henni finnst það mjög gaman, hef ekkert getað hlaupið fyrir þessum verk en þar sem hann er að verða liðin tíð þá verður maður víst að drullast til að nota græjuna aftur;) Enda ekki snert hann í marga mánuði og bara verð að drífa mig af stað. Þarf reyndar að fjárfesta mér í hlaupaskóm upp á aðeins tæp 30 þús þar sem ég þarf innanstyrkta en  ætla að kaupa mér þá í maí hlýt að verða rík þá;)

Best að fara að skríða upp í hjá litla barninu, er að lesa ísfólkið og það er svo spennandi að ég tek það framyfir gott sjónvarpsefni og horfi eiginlega ekki á tv á kvöldin.

Námskeiðstörn framundan, búin með eitt í fjarnámi og er svo að fara á námskeið á FSA á miðvikudag og fimmtudag um Stoðdeildir og svo 14 og 15 apríl um Stoðkerfið, ætla svo á eitthvað eitt enn fyrir sumarið. Búin að fá að vita hvernær ég fer í sumarfí og byrja ég 1 júlí og er til 12 ágúst íha bara snilld nema eitthvað breytist. Næ þá 2 vikum með Kötlu í fríi og pabbi hennar 2 vikum og svo fær hún aukafrí svona eftir því hvað mömmunni hentar. Efast um að maður fari neitt í sumar þar sem bensínið er hrikalega dýrt og allt hefur hækkað, bara vera dugleg að fara í sund og pikknikk hingað og þangað.

Best að afara að lesa

Yfirliði kveður.....