Ár og öld

Alveg næstum hætt að nenna að blogga Bendir kannski til að mér leiðist bara ekkert svo mikið, þar sem ég dett alltaf í blogg ef ég hef ekkert annað að gera eða mér leiðist..s.s. bara gott mál. 

Litlu jól HAKARA búin og tókust svona ljómandi vel hjá Heimahjúkrun, metþátttaka líka í þeim sem við viljum meina að hafi verið vegna þess að við sáum um þau, getur ekki annað verið. Enduðum svo í partý heima hjá dr. Braga sem var bara gaman og Mojito var drukkið af miklum móð, Katla Hildar stóð sig eins og sannur barþjónn og töfraði hvern drykkinn af fætur öðrum fram. Laugardeginum skulum við gleyma 

Fékk loksins rafvirkja til að tengja fyrir mig rafmagn í vegginn og henda upp einu ljósi og laga nokkrar dósir fyrir mig, var magnaður náungi sem kom frá Ljósgjafanum og var ekki lengi að þessu, næst er að finna smið sem hefur tíma, gæti orðið erfitt reyndar. Hildur sys gaf mér svo eldhúsljós og hann skellti því upp fyrir mig fyrst hann var nú byrjaður á annað borð

Döggin mín komin með æfingaleyfið og keyrði heim úr skólanum í dag, í drullufæri, og meira að segja umferðaröngþveiti á Þórunnarstræti þar sem var þriggja bíla árekstur. Leysti þetta ljómandi vel af hendi, sagði reyndar á leiðinni heim "mamma þarft ekki að segja hvert smáatriði sem ég á að gera". Enda sat ég og tuðaði "stefnuljós til hægri, stíga ögn á bremsuna, beygja til vinstri, hægja á þér" haha gamlan stressuð en hefði aldeilis ekki þurft þess. Er líka með æfingaleyfi á bíl pabba síns og er að skreppa til hans um helgina og fær að öllum líkindum að grípa í bensann hans *öfund*

Sko ég fór án gríns, næstum að grenja í morgun. Þegar við komum út þá ætluðum við aldrei að komast inn í bílinn, hann var bara læstur og ekki séns að opna hann, komst svo inn í hann að aftan, og þurfti að bora Kötlu í bílstólinn öfugu megin, Brynja sat afturí og ég þurfti að príla fyrst afturí og framí. ÉG HATA ÞENNAN BÍL. Um daginn læstist Katla inni í honum og ég sem betur fer var með hina lyklana á mér þannig að ég gat opnað. Ég er algjörlega komin með ógeð á þessum bíl. Ef ég ætti pening myndi ég skipta ekki spurning....við þurfum að leggja allavega hálftíma áður út til að bara að komast af stað á réttum tíma *ARG*

Jólaljós komin í alla glugga og 3 smákökutegundir af 5 komnar í dalla, ætla að baka annaðkvöld með Brynju mömmukökur og kattartungur. Jajá við borðum nebbilega alltaf smákökur á aðventunni en ekki um jólin því þá er maður að góssast í einhverju öðru. Ekkert byrjuð að kaupa jólagjafir en ætla að taka á því á mánudaginn þegar ég fæ útborgað alltsvo ef ég á einhvern pening eftir hahaha.

Er að dunda mér við að skipta um banka, en ég er búin að gefast upp á þessum ríkisteknu bönkum sem skipta um nafn á nokkurra mánaða fresti. Er að flytja mig yfir í Sparisjóð suður þingeyinga já sæll, eina með viti enda standa þeir vel að því er manni skilst og skipta ekki um nafn eftir dúk og disk.

Hætt að tuða og ætla að athuga hvort ég vakni ekki milli að morgni

OFURsjúlli kveður  

Mig langar til að..............

Þá er allt á fullu að undirbúa HAKjólin sem verða á föstudagskvöldið og heimahjúkrun á að sjá um þau. Skemmtiatriðin verða nú ekki af verri endanum og er æft algjörlega liggur við allan sólarhringinn::) Næsta æfing verður kl 17 á morgun og herregud ef ekki verður gaman Ætlum að hittast heima hjá Ninu áður en við förum og hrista okkur í fílinginn jibbí skibbí.

Kisan mín er öll að koma til og er meira að segja farin sjálf að týna úr sér saumana, duglegur kisi, tekur lyfin sín með rjóma á hverjum morgni en hefur enn ekki fengið að fara út, enda dregst hann enn hér um og getur ekkert stokkið, rétt kemur sér upp í sófann og búið. Á að koma í eftirlit á miðvikudaginn næsta og þá verða saumarnir teknir og vonandi kemur hann til með að ná sér bara. Greyið kallinn.

Var húsfundur í vikunni og við Katla stormuðum upp til Óla, ekkert svo sem merkilegt annað en verið að hækka hússjóðinn og sameinast um að skreyta eins allar svalir í húsinu. Ætla að fara á morgun og fjárfesta í seríu og henda upp kannski annaðkvöld eða um helgina.

Brynjan mín er búin að segja upp í vinnunni, er að kikna undan álagi og hefur varla tíma til að læra. Þannig að við leitum að öðrum eftir áramót, veit samt ekki hvenær hún fær að hætta, en allavega reddaði hann fyrir hana árshátiðinni þannig að hún missir ekki af henni. Svo er hún að fá æfingarleyfið ætla að fara á föstudaginn og sækja um það fyrir hana, merkið er komið á ísskápinn þannig að þetta er allt að bresta á. Líka það að þurfa að borga 85 þús fyrir fyrri hlutann. Hrikalega sem þetta er orðið dýrt maður, þetta kostaði 32 þús þegar ég tók það herra minn.

Erum komnar með ljós í alla glugga hjá okkur, nema eldhúsgluggann en það fer að bresta á, ætla að reyna að ná í fyrirtæki á morgun sem heitir smáverk og athuga hvort þeir geti lagað vegginn fyrir mig er algjörlega að drulla í mig að hafa þetta svona, ætla líka að hringja í rafvirkja og athuga hvort hann geti ekki dregið í rafmagn fyrir mig og rústað nokkrum dósum, fer bara á hausinn þá ef svo á að vera er að klikkast á að hafa þetta svona hálfklárað eitthvað.

Best að fara að rúlla sér inn í rúm og lesa í smá stund

OFURsjúlli kveður  

 

Kattasjúlli

Aumingja litli kisustrákurinn minn hann Snúður varð líklega fyrir bíl í dag og skreið hérna heim þessi ræfill, vældi svo af verkjum og ég fór með hann til dýralæknis sem taldi að líklega væri hann mjaðmagrindarbrotinn og eins er hann mökkbólginn á annarri loppunni, á að koma í röntgen í fyrramálið. Náði ekki í dýralækninn minn þannig að ég fór með hann til annars en fer til Elfu minnar á morgun með hann. Hann var settur á róandi, bólgueyðandi og verkjastillandi og hann er eins og meðvitundarlaus núna en malar engu að síður líður greinilega betur en í dag:) Ræsti út Eyþór til að sitja hjá Kötlu á meðan við mægður fórum með hann haha ef það eru ekki börnin þá eru það kettirnir:)

Var rosalega dugleg í gærkvöldi og málaði loksins loftið á ganginum hjá mér en það er búið að vera á planinu hjá mér síðan ég flutti inn en loksins rauk mín í það og vá hvað þetta er leiðinlegt en birti mikið á ganginum, enda dökkur viður í loftinu sem gerði þetta svolítið drungalegt.  Næst ætla ég að rífa harmonikuhurðina sem er fyrir þvottahúsinu í burtu og setja bara tjald þar fyrir til að byrja með en langar svo að fá mér svona plastglerhurð einhverjar fyrir svona rennidæmi, verður einhvern tímann, finnst þessi hurð sem er fyrir bara óþolandi. 

Fór í starfsmannaviðtal í dag, og í því átti maður að meta sína eigin kosti, ég á ekki mjög einfalt með að hæla sjálfri mér, en restin af viðtalinu var fínt, létt og laggott:) Ætla að reyna að komast á sáranámskeið eftir áramót ef verður í boði og einnig er ég að spá í heilabilunarnámskeið, þarf að kanna hvað er í boði og hvað það kostar.

Best að reyna að sofna smávegis, þarf að vera með annað augað í kettinum ef hann vaknar svo hann fari sér ekki að voða því hann á víst að liggja því sem næst kyrr...

OFURsjúlli kveður kattahjúkrari 

Allt og ekkert

Bara næstum komin jól já það styttist. Gaman að því, leyfði stóra barninu mínu að henda upp tveimur seríum í dag, litla barninu til mikillar gleði. Ágætt að fara að lýsa aðeins upp skammdegið. Enda var Brynja varla búin þegar Pólverjarnir í húsinu á móti voru búnir líka að henda upp, alltaf þarf einhvern einn til að byrja:) Við erum vanar því mæðgur að vera fyrstar því við vorum alltaf langfyrstar á munkanum enda mikil jólabörn hér á ferð.

Helgin þýtur áfram eins og alltaf, finnst ég nýbyrjuð í fríi en það er jú alveg að koma sunnudagur og ég að verða 37 ára *hnuss* en það er góður aldur engu að síður. Vildi samt alveg vera 27 ára ennþá:)

Brynjan mín fer í fimmta ökutímann á þriðjudag og er þá hálfnuð með þá tíma sem hún þarf til að mega fá æfingaleyfið, fer svo eftir rúma viku í ökuskólann það bóklega og voila þá bara getur maður látið hana keyra hægri vinstri. Henni gengur ljómandi vel í ökutímunum og er farin að leiðrétta mig þegar við erum að keyra, verð líklega ekki efnilegasti leiðbeinandinn haha. Þarf að fara með ökukennara einn tíma áður en hún fær æfingaleyfið verður gaman. Hún stendur sig alveg eins og hetja í skólanum brillerar með mjög góðar einkunnir og er dugleg að læra, enginn fótbolti núna þannig að hann tekur ekki tíma, en held hún sé að spá í að losa sig undan vinnunni og athuga hvort hún fái ekki einhverja aðra vinnu eftir áramót sem er á betri tímum fyrir hana. Hentar ekki alveg nógu vel með boltanum. Eins finnst mér nú fúlt ef hún þarf að missa af árshátíðinni sinni vegna vinnu, vildi að eigandinn reddaði henni en það kemur í ljós.

Fórum aðeins í húsasmiðjuna í dag og þar missti Katla sig í jólafíling mikið að skoða og fannst henni þetta alveg óhemju gaman að skoða þetta allt. Annars búin að vera rellin um helgina og held ég að hún sé að taka jaxla allavega kveinkaði hún sér þegar ég þreifaði góminn á henni. Vona að það líði hjá sem fyrst.

Ég ætla ekki að geta losað mig við kvefið sem ég er búin að vera með á fjórðu viku og er eiginlega alveg komin með nóg en hlýtur að vera að fara trúi ekki öðru.

Ætlaði að fara að mála loftið á ganginum og gerði allt klárt en fór svo í smá pásu og nenni ekki að mála, sé til hvað ég geri á morgun dúddamía þetta loft er hausverkur því það er svo erfitt að mála uppfyrir sig í svona skörðótt loft en það kemur að því. Síðan fer ég í að láta gera vegginn og rafmagn og þá verð ég líklega komin á hausinn.

Best að fara að sofa bara í hausinn á sér já eða lesa

OFURsjúlli kveður alveg að verða 37 ára 

Gjemla gjemla sys á afmæli á morgun :)

Helgin nýbúin og alveg að koma önnur, er ekki hægt að hægja á möndli (segir maður það ekki) jarðar. Finnst tíminn líða alltof hratt, það eru alveg bráðum að koma á jól, dúddamía ég segi ekki annað.

Helgin var róleg bara, ekki sofið eins mikið og ég ætlaði, vakti langt fram á nætur en vaknaði engu að síður á sama tíma og venjulega um kl 7, þannig að ég var þreyttari eftir helgina en ég ætlaði mér. Náði hitanum úr mér en sit enn eftir með hellings kvef, ekki að skilja þetta. Katla kom svo í gær frá pabba sínum glöð og kát, reyndar komin með andstyggilega sýkingu í augað sem ég ætla að fara á morgun og fá eitthvað við fyrir hana, en annars alveg mjög hress.

Þær systur eru náttúrulega bara algerir jólaenglar og elska báðar allt sem viðkemur jólum, Katla búin að vera að skoða í jólakassa og hvert "vááið" á fætur öðru komið út úr henni. Síðan setti Brynja seríu í vasa inni hjá sér áðan og sú stutta gaf sig ekki fyrr en hún fékk það samþykkt að þær ættu þessi fallegu ljós saman:)

Ætla að fá rafvirkja til að græja fyrir mig innstungur um mánaðarmótin og hendast svo í að láta gera vegginn kláran fyrir jólin þá læt ég annað bíða þangað til eftir jól. Kostar augun úr að fá iðnaðarmann. Þarf að láta skipta um nokkrar dósir og draga í innstungur á veggnum, viss um að ég get gert þetta sjálf en ég bara þyrfti að sjá þetta gert fyrst, get kannski látið skipta um eina dós og legið utaní manninum á meðan, nema einhver sé svo klár og vilji bjóða sig fram í rafmagn og smíðar??? Vinur Brynju er að læra smiðinn og ég er alltaf að reyna að fá hana til að bjóða honum heim svo ég geti narrað hann í vegginn en ekki tekist enn Held áfram að reyna haha.

Ekki enn komin í fíling fyrir jólakortin og er ekkert byrjuð neinei, óvenjulegt þegar ég á í hlut en það vantar einhver vilja í mig núna.

Fékk tíma fyrir pabba í svínaflensusprautu þar sem kom í ljós að hann er í áhættuhóp, tók tíma sinn að komast að því þar sem hann hefur ekki neinn heimilislækni ennþá, en ég er búin að sækja um einn slíkan fyrir hann og vonandi kemst hann bara að hjá honum. 

Hildur sys verður fertug á morgun, jasvei hvað tíminn líður hratt en allt er fertugum fært svo málið er gott sko:) Fór í afmæli til einnar yndislegrar í dag sem vinnur með mér en hún varð sextug,  

Alltaf nóg að gera í vinnunni eins og við er að búast, stöðug hlaup hjá mér fyrir hádegi eiginlega, minna eftir hádegi en jafnast út ef litið er á daginn. Hef eiginlega ekkert að segja allavega..

Well ætla að drullast í bælið og fara að lesa agalega spennandi bók sem ég reyndar er að falla á tíma með, á að vera búin að skila henni held ég en það kemur í ljós þegar þar að kemur...

OFURsjúlli kveður.... 

 

 

Sweet sixteen::)

Stóra barnið mitt orðið 16 ára, meira að segja eftir korter fyrir 16 árum þá fæddist hún Gekk svo frábærlega sú fæðing og er í alla staði ánægjuleg upplifun, enda var ég spurð þegar ég var búin að eiga hana, heldurðu að þú gerir þetta aftur "já ég hélt það nú" enda fann ég ekki fyrir því:) 

Í gærkvöldi kom vinkonan hennar hún Telma í heimsókn og þær bökuðu svo flotta súkkulaðiköku og skreyttu og buðu mér svo í kaffi, alger krútt.

Búin að fá mikið af fallegum kveðjum í dag og fallegum og flottum gjöfum stelpan. Ætla að bjóða í smá kaffi á sunnudag, Katla verður reyndar ekki heima en það verður bara svo að vera. Hringdi í ökukennara fyrir Brynju í gær og hann vildi óður og uppvægur fá að taka hana í fyrsta ökutímann í dag þar sem hún ætti afmæli, þannig að kl 18 í dag þá verður hún formlega farin að læra á bíl

Ég er að duddast alltaf með þetta kvef, búin að fara alltaf í vinnuna en ætla að setja ? merki við morgundaginn, er með hitavellu og hrikalegan hausverk en svo kannski verð ég hress á morgun hver veit. Katla er hjá pabba sínum en þau ætla að koma og borða hérna á eftir og svo fer hún aftur til hans um helgina. Ætla að vinna fyrir eina á föstudagskvöldið þar sem Brynja ætlar hvort sem er að bjóða vinkonum í mat þannig að það verður flott bara:)

Stutt í dag

OFURsjúlli kveður glaður með að eiga 16 ára fallegan snilling 

Tunglið tunglið taktu mig:)

Katlan litla var alveg dolfallin yfir þessu fallega tungli sem skín hérna hátt á himni, fór með stól að glugganum og sönglaði "tunglið mitt tunglið mitt " bara krútt. Var bara til hádegis í leiksskólanum þar sem það var starfsdagur þar þannig að ég fékk að hætta kl 12 í vinnunni og sækja hana. Var í rosastuði og ætlaði aldrei að vilja leggja sig en það tókst fyrir rest. Frænkurnar Sólir vöktu hana síðan með boði um rúnt með mömmunni og fórum við mæðgur niður í Kbbanka og fengum svona líka fín endurskinsmerki:) Stökk í leiðinni og sótti bók á bókasafnið sem ég var búin að láta taka frá fyrir mig og heitir "Stúlkan sem lék sér að eldinum", bíð spennt eftir að byrja allavega ef hún er eins góð og "karlar sem hata konur"

Brynja er í fríi frá MA vegna einhvers vetrarfrís og verður líka í fríi á morgun og svo rennur upp 16 afmælisdagurinn sem er beðið eftir með mikilli eftirvæntingu. Ætli maður hafi ekki verið svona líka, minnir það fannst ég eiginlega vera orðin fullorðin þegar ég varð 16 ára. Datt í það og ældi heil ósköp eftir að hafa drukkið kaftein morgan í mix (bragðaðist eins og grænn klaki), úff gleymi því aldrei var við vegamótin að Tjörn þegar maginn gerði uppsteyt....halleljúa Brynjan mín ætlar ekki að gera það heldur bjóða nokkrum vinkonum í mat og ég flyt að heiman og leyfi þeim að vera hér einum, einhver sem vill mig í heimsókn nei býst ekki við því Ekki búin að kaupa gjöfin en var búin að ákveða hvað ég ætlaði að gefa henni og ætlaði að dekstra hana smá á föstudag, en það klikkaði þar sem það er eitthvað fótboltamót í MA og þar verður hún til kl 17 og svo klipping eftir það. En ég finn kannski bara eitthvað annað eða leyfi henni að ráða hvenær ég dekstra hana......

Ég fer í klippingu á föstudag kl 15 og ekki veitir af og þá þarf ég að vera búin að ákveða hvenær ég ætla að mæta með genin í jólaklippingu því "Íris mín" eins og Katla segir, er farin að bóka það.

Núna er litla genið búin að setja bastkörfu á hausinn og skipar mér að syngja afmælissönginn fyrir sig þar sem hún eigi afmæli, "nei Katla mín þú átt ekki afmæli í dag" "Víst mamma á ég afmæli" hahaha svekkelsi að hún á aldrei afmæli alltaf bara einhver annar í leiksskólanum haha...verður að fá smá pakka þegar Brynja á afmæli....Brynja gaf henni samt smá pakka á föstudaginn sem innihélt púsl og var litla genið alveg í skýjunum með það.

Vinaviku lauk á föstudaginn en allt í einu birtist hér myndarpiltur með pakka og blóm til mín frá leynivini mínum, bodylotion, sturtusápu og kerti og svo fyrrtalin blóm. Veit hver vinurinn minn er og hún er bara yndisleg kona:) Knúsa hana við tækifæri....Takk Palla mín::)

Vaknaði í nótt, rennsveitt eftir að hafa dreymt þvílíkt rugl og var með 9 kommur þegar ég mældi mig í morgun, gúllaði í 2 tbl paratabs og skundaði svo til vinnu, finn núna að hálsinn er að verða alveg helaumur á vanda til streptokokka þannig að mér finnst þetta líkjast því en ætla að láta á þetta reyna aðeins lengur, bara nenni ekki að hanga hérna heima lasin, en geri það frekar en að hætta á að veikja gamla fólkið mitt.

Best að hætta þessu rausi og væli og fara að sinna geninu

OFURsjúlli kveður skárri í skapi en í gær 

Þjófnaður í sameigninni....hvað er að

Er svo öskuill núna að ég næ mér varla niður. Erum með sameiginlegt þvottahús í sameigninni sem er svo heitt að þvotturinn þornar á no time. Hef nýtt mér þetta x 3 þegar ekki hefur verið hægt að hengja á snúrurnar á pallinum mínum. Í öll þessi þrjú skipti hefur eitthvað horfið, íþróttabuxur, eitthvað sem ég átta mig ekki á og svo Cintamania peysan mín sem by the way kostar 18 þús.... þegar ég segi ég átti mig ekki á þá sé ég bara að það er skarð í fötin og lafa föt sitthvorumegin við flíkina sem hvarf. Það er eins og einhver fylgist með því þegar ég hengi upp hvað er að fólki. Brynja átti hitt tvennt sem hvarf og þetta er óþolandi. Ætla að kæra þetta til löggunnar hefur svo sem ekkert upp á sig en hvað getur maður annað gert, ætla að henda upp miða og biðja fólk að gá hvort það hafi "óvart" farið í miðjuna á mínum fatnaði og tekið þar eina flík eða svo...allt eins þessa dagana

Til að toppa helgina þá var brjálað partý á pallinum hjá mér og hefði mér verið sama ef það hefði verið búið um kl 00-1 en nei það var meira og minna alla helvítis nóttina. Ekki svo sem mikið sofið þá nótt en so what til hvers þarf maður að sofa þegar maður getur gert það þegar maður verður gamall. Væri allt í lagi ef þetta væri bara stundum en þetta er að verða ansi oft.

Búin að vera að hengjast úr kvefi og hausverk alla helgina en ekki myndi það titlast vera veikindi onei, mæti eins og herforingi alltaf í vinnuna ekki spurning, ætla samt að fá að vera í fríi eftir hádegi á morgun þar sem leiksskólinn verður lokaður eftir kl 12.15. Klára bara mitt á methraða og fæ svo að fara jájá.

Veit ekki hvernig hlutirnir koma til með að tæklast á næstunni sýnist að þrátt fyrir aukna vinnu og meiri tekjur þá hækkar allt enn og mér sýnist maður rétt ná að skrimta bara áfram ef maður nær því þá, maður er orðinn peningalaus síðustu vikuna í mánuðinum, og hvernig getur maður það með 2 börn og annað á bleyju tja maður spyr sig. Langar að flytja út, buin að vera að skoða og þó svo að ég myndi bara leigja íbúðina, og láta hana borga sig að mestu, skilja öll húsgögn eftir og fara, leigja úti og borga þetta venjulega þá myndi ég samt eiga mun meiri pening, hærri laun, hærri skattar en samt myndi maður hafa meira á milli handanna, skil vel þá sem fara af landinu. Hugsa að þetta væri ekki galið í 1-2 ár til að koma sér á réttan kjöl eða á meðan það alversta gengur yfir hér á klakanum. Búin að vera að tala við lið sem er í Noregi og þetta er að virka allavega hjá þessum 3 fjölskyldum sem eru þar svo þetta er spurning.

Margt að hringla í hausnum á mér núna, en hvað veit maður.

Viddi mágsi minn á afmæli í dag til lukku með það kallinn, er svo skapvond að ég legg það ekki á hann að hringja, hringi bara seinna.

Við Katla fengum okkur göngutúr í morgun með viðkomu hjá pabba sem bauð upp á Nóa Síríus með kaffinu, ég færði honum nokkrar lummur þar sem við Katla skelltum afganginum af hrísgrjónagrautnum í lummur í morgun:) Kötlu fannst þær reyndar vondar Skellti líka í eitt hollustubrauð í morgun eins gott að baka eitthvað svo eitthvað sé til, lítið annað í skápum en það sem maður býr til.

Ætla að skapvonskast aðeins á öðrum vettvangi

OFURsjúlli kveður verulega spældur 

Lífið í hnotskurn

Merkilegt hvað horið virðist ætla að vera fast í manni og ekki bara það heldur hóstar maður svo mikið að það hreinlega liggur við að maður mígi á sig hvað er að gerast Skyldi maður þjást af áreynsluþvagleka haha svo maður finni einhverja greiningu. Segi svona, en þetta kvef er alveg ótrúlegt eykst dag frá degi og þar sem það er að koma helgi hef ég sterklega á tilfinningunni að ég verði alveg haugstífluð en það kemur nú í ljós.

Hef engan tíma í svoleiðis vitleysu, ætlum að hafa föndurdag við systur með litlu börnunum okkar, sem endar líklega á að við verðum tvær að dunda okkur haha, Brynja er að fara á Krókinn til pabba síns og fjölsk. og ætlar að taka Telmu vinkonu sína með sem er nú bara gaman, væsir nú ekki um þær hjá Sigurpáli og co:)

Stendur yfir vinavika í vinnunni og maður er stöðugt að laumast með pakka hingað og þangað voða gaman og að sjálfsögðu er maður að fá pakka líka, fékk servettur og servettuhringi í gær ásamt fallega orðuðu korti Alltaf gaman að fá smá svona hól eða jákvæðni.

Svo i fyrramálið býður mín starfsstöð Þorpsstöðinni í vöfflukaffi til skrafs og ráðagerða vegna litlu jólanna sem við í heimahjúkrun eigum að sjá um, nokkrar hugmyndir komnar upp á borðið en það á eftir að útfæra þær ögn mikið, vildi að maður væri skemmtikraftur af guðs náð þá væri þetta ekkert mál.

Annars er allt voðalega rólegt bara, Katla er hress og kát, fór með pabba sínum í dag að fá sér ís og kom svo aftur, var í roknastuði hérna í allt kvöld með frænkum sínum og var mjög fljót að sofna, fór á bókasafnið og fékk lánaðar nokkrar bækur sem sló svona í gegn hjá henni vill bara lesa þegar hún kemur heim á daginn núna:)

Ætla að horfa á eina mynd í tv og fara svo að halla mér

OFURsjúlli kveður pirraður út í auðmenn.... 

Ekkert....

Drepast úr leiðindum og hvað gerir maður þá nema detta hér inn og ausa úr sér einhverri vitleysu Var að verða geðveik á fésinu um helgina komst inn á það en gat ekkert gert, fattaði svo að auðvitað var þetta firefoxið að bögga mig þannig að ég skipti yfir á safari og voila allt annað mál, get núna haldið áfram að tuða á fési allra heimsmanna

Enn á þeim stað að geta ekki gert það upp við mig hvort ég ætli að vera lasin eða ekki, drulluslöpp í kvöld með hálsbólgu og hor, og smá hausverk en ekkert fárveik, hress svo á morgun eins og verið hefur sl. 2 daga. Svínið komið á hæðina fyrir ofan mig svo maður bara krossar putta að liðið hér sleppi, þetta er allstaðar þetta helvíti.

Skjárinn líka að gera mig geðveikari en ég er, alltaf að frjósa svona ca á 2 mín fresti, búin að vera að spjalla við drengina í 8007000 reglulega um helgina og urðum við loksins sammála áðan að fá bara viðgerðarmann hingað á morgun þar sem hann sá einhverja bilun hjá mér, tja ekki gaman að þessu sérstaklega ekki þegar maður er ða reyna að horfa á eitthvað sem er mjög spennandi...

Sótti Kötlu á kotið í dag og hún var í svo miklu blaðurstuði að hún þagnaði ekki fyrr en hún sofnaði, var nonstop að spjalla í allan dag, snillingur.

Hef ekkert að segja og ætla að fara að íhuga bólið mitt fljótlega þannig að ég bið bara alla vel að lifa í bili

OFURsjúlli kveður mállaus aldrei þessu vant.